அல்லு அர்ஜூன் நடிக்கும் புஷ்பா -2 திரைப்படத்தின் ட்ரெய்லர், “புஷ்பா’ங்கிறது பெயர் இல்ல ; ப்ராண்ட்!…” என கேப்சனுடன் வெளியாகி மிரட்டி வருகிறது. பல்வேறு மொழிகளிலும் ட்ரெய்லர் வெளியான 12 மணி நேரத்தில், பல மில்லியன் பார்வைகளை கடந்து சக்கைப்போடுப் போட்டு வருகிறது.
சுகுமார் இயக்கத்தில் அல்லு அர்ஜூன் நடிப்பில், 2021-ம் ஆண்டில் வெளியான புஷ்பா திரைப்படம் சூப்பர் டூப்பர் ஹிட்டானது. இதன் 2-வது பாகமான Pushpa -2 The Rule திரைப்படம், வரும் டிசம்பர் 5ம் தேதி உலகம் முழுவதும் வெளியாக உள்ளது. இதில் ஃபகத் ஃபாசில் வில்லனாக நடித்து உள்ளார். ராஷ்மிகா மந்தனா நாயகியாக நடித்துள்ளார். புஷ்பா -2 திரைப்படத்தில் தேவி ஸ்ரீ பிரசாத் உடன், தமன் பின்னணி இசை அமைத்துள்ளார்.
இந்நிலையில் ரசிகர்கள் மிகவும் எதிர்பார்த்து காத்திருந்த புஷ்பா -2 ட்ரெய்லர், தெலுங்கு, தமிழ், மலையாளம், கன்னடம், ஹிந்தி மொழிகளில் நேற்று வெளியானது. இந்தப் படத்தின் முதல் பாகத்தில் நடிகை சமந்தா ஒரு பாடலுக்கு நடனமாடியிருந்தார். அதேபோலவே புஷ்பா -2 படத்தில் ஶ்ரீலீலா கேமியோ செய்துள்ளது ரசிகர்களின் எதிர்பார்ப்பை அதிகரித்துள்ளது. இந்த படத்தை 500 கோடி ரூபாய் பட்ஜெட்டில் உருவாகியுள்ளதாக தயாரிப்பு நிறுவனம் தெரிவித்துள்ளது.
புஷ்பா -2 திரைப்படத்திற்கான ஓடிடி உரிமையை நெட்ஃப்ளிக்ஸ் கைப்பற்றியுள்ளதாக கூறப்படுகிறது. தெலுங்கு, தமிழ், இந்தி, கன்னடம் மற்றும் மலையாளம் மொழிகளில் நெட்ஃப்ளிக்ஸில் இந்த படம் வெளியாகும் என தெரிகிறது. இதன் மதிப்பு மட்டும் ரூபாய் 270 கோடி ரூபாய் அளவிற்கு இருக்குமாம்… புஷ்பா -2 படம் திரையரங்கில் வெளியிடுவதற்கான வர்த்தகம் மட்டும் தற்போது வரை 650 கோடி ரூபாய் வரை நடந்துள்ளதாக தகவல் வெளியாகி இருக்கிறது.
முன்னதாக புஷ்பா திரைப்படத்திற்காக நடிகர் அல்லு அர்ஜூன், இசையமைப்பாளர் தேவிஶ்ரீ பிரசாத் ஆகியோர் தேசிய விருதுகள் வென்றது குறிப்பிடத்தக்கது.
